အမှတ်စဉ်။ ။ ၄ /၂၀၂၅
မတ်လ (၉) ရက်၊ ၂၀၂၅ခုနှစ်။
ဖေဖော်ဝါရီ ၁၃ ရက်နေ့တွင် အာဂျင်တီးနားနိုင်ငံရှိ ဖက်ဒရယ်ဆိုင်ရာ ရာဇဝတ်မှု တရားရုံးမှ မြန်မာနိုင်ငံရှိ စစ်ဘက်ဆိုင်ရာ ခေါင်းဆောင် လူပုဂ္ဂိုလ် ၂၃ ဦး နှင့် အရပ်ဘက် အစိုးရ ခေါင်းဆောင် လူပုဂ္ဂိုလ် ၂ ဦးအား ရိုဟင်ဂျာလူမျိုးများအပေါ် လူမျိုးတုံးသတ်ဖြတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် တရားစီရင်နိုင်ရေး ဖမ်းဝရမ်း ထုတ်ခဲ့သည့်အပေါ် ဘက်မလိုက်သော တရားမျှတမှုရရှိရေးအတွက် သွေးစွန်းငွေ ဖြတ်တောက်ရေး လှုပ်ရှားမှု အဖွဲ့ အနေဖြင့် ကြိုဆိုပါသည်။
မြန်မာနိုင်ငံတွင် ၁၉၇၈ ခုနှစ်ကတည်းက စတင်ခဲ့သည့် ရိုဟင်ဂျာ လူမျိုးများကို လူမျိုးတုံး သတ်ဖြတ်မှုနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို ၂၀၁၂ ခုနှစ် အရပ်သားတပိုင်း စစ်တပိုင်း အစိုးရ (သိန်းစိန် အစိုးရ) လက်ထက်တွင်လည်း ကျူးလွန်ခဲ့သည်။ ထို့နောက် အရပ်သားအစိုးရ တက်လာပြီး ၂၀၁၆ ခုနှစ်နှင့် ၂၀၁၇ ခုနှစ်များတွင် အကြီးမားဆုံးသော လူမျိုးတုံးသတ်ဖြတ်မှုများ ဖြစ်ပွားခဲ့သည်။ မြန်မာနိုင်ငံ၏ ၂၀၀၈ အခြေခံဥပဒေသည် မည်သို့သော အခြေအနေတွင် ဖြစ်ပါစေ အရပ်သားအစိုးရသည် ပြည်သူလူထုကို အကာအကွယ် ပေးနိုင်ရမည်ဟု ကျွန်ုပ်တို့ မှတ်ယူပါသည်။ သို့သော်လည်း ထိုကဲ့သို့ အကာအကွယ် မပေးခဲ့သည်ကို အထင်အရှား မှတ်တမ်းများဖြင့် သက်သေများရှိခဲ့ပါသည်။
ထို့ကြောင့် အာဂျင်တီးနားတရားရုံးသည် အပြည်ပြည်ဆိုင်ရာ တရားစီရင်မှုအောက်မှ လွတ်လပ်ပြီး ဘက်လိုက်မှုမရှိသော ဆုံးဖြတ်ချက်ကို ချမှတ်ခဲ့သည်ဟု သွေးစွန်းငွေ ဖြတ်တောက်ရေး လှုပ်ရှားမှု အဖွဲ့ အနေဖြင့် ယုံကြည်ပါသည်။ ထို့အပြင် ယခုထုတ်ပြန်ခဲ့သည့် ဖမ်းဝရမ်းသည် ရာဇဝတ်မှုအတွက် သံသယရှိသူများထဲမှ ပြစ်မှုထင်ရှားသူများကို ဖော်ထုတ် တရားစီးရင်နိုင်ရန် ရုံးတော်သို့ ခေါ်ယူခြင်းဖြစ်သည်ဟု နားလည်ပါသည်။
အာဂျင်တီးနား အစိုးရ အနေဖြင့် နိုင်ငံတကာ ရာဇဝတ်မှုဆိုင်ရာ ရဲအဖွဲ့ (interpol) မှ အလျင်အမြန် ပူးပေါင်းဆောင်ရွက် ဖမ်းဆီးမိန့်များ (red notice) ထုတ်ပြန်ရေး တောင်းဆိုရန်လည်း ကျွန်ုပ်တို့ တိုက်တွန်းအပ်ပါသည်။
သွေးစွန်းငွေ ဖြတ်တောက်ရေး လှုပ်ရှားမှုအဖွဲ့ အနေဖြင့် လူမျိုးတုံးသတ်ဖြတ်မှု ကျူးလွန်ခံခဲ့ရသော ရိုဟင်ဂျာလူမျိုးများနှင့်အတူ တရားမျှတမှု ရရှိသည်အထိ ဆက်လက်ရပ်တည်သွားမည်ဖြစ်ပြီး ယခုဖြစ်ပေါ်လျက်ရှိသော မြန်မာနိုင်ငံတဝှမ်း လူမျိုးစု ဒေသ အသီးသီးနှင့် ပြည်သူများအပေါ် အကြမ်းဖက် စစ်အုပ်စု၏ လူသားမျိုးနွယ်အပေါ် ကျူးလွန်သည့် ရာဇဝတ်မှုများနှင့် စစ်ရာဇဝတ်မှုများအတွက် သာမက မည်သည့် လက်နက်ကိုင် အဖွဲ့အစည်းကမဆို ကျူးလွန်ခဲ့သော ရာဇဝတ်မှုများအတွက် တရားမျှတမှု ရရှိရန် အဖိနှိပ်ခံများနှင့်အတူ တသားတည်း ရပ်တည်၍ ဆက်လက် ပူးပေါင်း လုပ်ဆောင် သွားမည်ဖြစ်ကြောင်း သဘောထားထုတ်ပြန်အပ်ပါသည်။
“တရားဥပဒေအထက်တွင် မည်သူမျှ မရှိစေရ”
သွေးစည်း ညီညွတ်စွာဖြင့်
သွေးစွန်းငွေ ဖြတ်တောက်ရေး လှုပ်ရှားမှုအဖွဲ့
