[သတင်းထုတ်ပြန်ချက်] ရာဇဝတ်ဂိုဏ်း စစ်အုပ်စု၏ လေကြောင်းတိုက်ခိုက်မှုများကို နိုင်ငံတကာမှ ဆက်လက်ပံ့ပိုးနေသဖြင့် နေ့စဉ် ရှင်သန် ရပ်တည်ရန် ဆိုးရွားသော အကျိုးဆက်များ ဖြစ်ပေါ်နေ

အမှတ်စဉ် ။ ။ ၁/၂၀၂၅

ဇန်နဝါရီ ၁၀ ရက်၊ ၂၀၂၅ ခုနှစ်။

မြန်မာစစ်အုပ်စုထံ လေယာဉ်ဆီ၊ လေယာဉ် နှင့် ဆက်စပ်ပစ္စည်းများ၊ နည်းပညာများ တင်ပို့ရောင်းချခြင်းကို ချက်ချင်း ရပ်တန့်ရန် သွေးစွန်းငွေ ဖြတ်တောက်ရေး လှုပ်ရှားမှု အဖွဲ့မှ အာဆီယံ အပါအဝင် ကုလသမဂ္ဂ အဖွဲ့ဝင် နိုင်ငံများနှင့် နိုင်ငံတကာကုမ္ပဏီများသို့ တောင်းဆို။

Blood Money Campaign ( သွေးစွန်းငွေ ဖြတ်တောက်ရေး လှုပ်ရှားမှု) ၏ သုတေသန အစီရင်ခံစာတွင် မြန်မာ စစ်အုပ်စု၏ လေကြောင်းတိုက်ခိုက်မှုများကို နိုင်ငံတကာမှ ဆက်လက်ပံ့ပိုးနေသဖြင့် အရပ်သား ပြည်သူများ၏ အသက်အန္တရာယ် ဆုံးရှုံးရသည့်အပြင် နေ့စဉ် လူမှုဘဝ အသက်မွေးဝမ်းကျောင်း နှင့် အခြေခံ လိုအပ်ချက်များ အပေါ် ဆိုးရွားသော အကျိုးဆက်များ ဖြစ်ပေါ်နေကြောင်းကို တွေ့ရှိရသည်။

“ ကောင်းကင်ကြီးကိုပိတ် : မြန်မာပြည်အပေါ် လေယာဉ်ဆီ ပိတ်ဆို့အ‌ရေးယူရန် ပျက်ကွက်မှုများ၏ နောက်ဆက်တွဲ ဆိုးကျိုးများ။ ” သုသေတန စာတမ်း အစီရင်ခံစာတွင် လေကြောင်းတိုက်ခိုက်မှုကို ထွက်ပြေးတိမ်းရှောင်ရင်း အသက်ဘေးမှ လွတ်မြောက်ခဲ့သည့် အရပ်သားများ၏ ကိုယ်တွေ့ ဖြစ်ရပ်များ ပါဝင်သည်။ လေကြောင်း တိုက်ခိုက်မှုများ၊ လေယာဉ်များ အဆက်မပြတ် ပျံဝဲခြင်းနှင့် နေရပ်စွန့်ခွာ ထွက်ပြေး တိမ်းရှောင်ရခြင်းများကြောင့် ပညာသင်ကြားခွင့်များနှင့် ကျန်းမာရေးဆိုင်ရာ ဝန်ဆောင်မှုများ ဆုံးရှုံးနေရခြင်း၊ အစာရေစာ ပြတ်လတ်မှုများ၊ စိတ်ပိုင်းဆိုင်ရာ ဒဏ်ရာများ နာကျင်ထိခိုက်ရမှုများနှင့်အတူ စိုက်ပျိုးရေးကို အဓိက မှီခိုသည့် အသက်မွေးဝမ်းကျောင်း အလုပ်အကိုင်များ ဆိုးရွားစွာ ပျက်စီးနေရသည့် အခြေအနေများနှင့် လက်ရှိ ရင်ဆိုင်နေရသည့် စိန်ခေါ်မှုများကို ဖော်ပြထားသည်။

စစ်အုပ်စုသည် တိုင်းပြည်အာဏာကို စတင်လုယူချိန်မှစ၍ (၄) နှစ်နီးပါး အချိန်ကာလအတွင်း တိုင်းပြည်၏ စီးပွားရေးနှင့် ဘဏ္ဍာရေးကို စိတ်ကြိုက် စိုးမိုးခြယ်လှယ်လျက်ရှိပြီး အရပ်ဘက် (ခရီးသည်တင်) လေကြောင်းလိုင်းများ၏ လေယာဉ်ဆီများကိုပါ စစ်ရေးတွင် အသုံးပြု၍ ပြည်သူများအား ပစ်မှတ်ထား တိုက်ခိုက်နေသည်။ လေ့လာတွေ့ရှိချက်များအရ စစ်အုပ်စုသည် လေကြောင်းမှ တိုက်ခိုက်ရာတွင် ပြည်သူအများအပြားစုဝေးသော ဈေး၊ အလှူအတန်းနေရာ၊ ပွဲလမ်းသဘင်၊ ဘာသာရေးပွဲတော်များ၊ ဆေးရုံဆေးခန်းများနှင့် ကျောင်းများကိုပါ တိုက်ခိုက်နေကြောင်း တွေ့ရသည်။

လက်ရှိအချိန်ထိ နိုင်ငံတကာမှ လေယာဉ်ဆီ ပိတ်ဆို့ ဒဏ်ခတ်အရေးယူမှုများသည် မြန်မာပြည်တွင်း ကုမ္ပဏီများကိုသာ ပိတ်ဆို့ခြင်းဖြစ်ပါသည်။ ထိုပြည်တွင်း ကုမ္ပဏီများကို တင်ပို့ပေးနေသော အဓိကကျသည့် နိုင်ငံတကာ ကုမ္ပဏီများကို အရေးမယူသေးပါ။ ပိတ်ဆို့အရေးယူမှုများ၏ စောင့်ကြည့်ရေး ယန္တရား နှင့် အရေးယူ ထိရောက်မှုများ အားနည်းသောကြောင့် မြန်မာ ရာဇဝတ်ဂိုဏ်း စစ်အုပ်စု အနေဖြင့်လည်း နိုင်ငံတကာမှ လေယာဉ်ဆီ၊ လေယာဉ်နှင့် လေယာဉ်အစိတ်အပိုင်းများ၊ နည်းပညာဆိုင်ရာ ပြုပြင် ထိန်းသိမ်းရေး ဝန်ဆောင်မှုများကို ဆက်လက်ရရှိနေဆဲ ဖြစ်သည်။ စီးပွားဖြစ် အရပ်ဘက် လေယာဉ်များနှင့် လေယာဉ်ဆီ များကိုလည်း အလွဲသုံးစားပြုလုပ်ပြီး စစ်ရေးတွင် သုံးစွဲနေပါသည်။

စစ်အုပ်စုသည် နိုင်ငံတကာ လူသားချင်းစာနာထောက်ထားမှုဆိုင်ရာ ဥပဒေ အခန်း ၂ နှင့် ၃ တွင် ဖော်ပြထားသည့် အရပ်ဘက် နှင့် စစ်ဘက်ဆိုင်ရာ မခွဲခြားဘဲ တိုက်ခိုက်မှုများကြောင့် စစ်ပွဲဆိုင်ရာ ဥပဒေများကို လုံးဝ လိုက်နာခြင်း မရှိသည့်အပြင် တဖက်မှာလည်း နိုင်ငံတကာ အစိုးရများ နှင့် ကုမ္ပဏီများသည် လေကြောင်း လောင်စာဆီ နှင့် ဆက်စပ်ပစ္စည်းများ ဆက်လက်‌ရောင်းချ ထောက်ပံ့နေခြင်းဖြင့် ထိုချိုးဖောက်မှုများတွင် ပါဝင် ပတ်သက်နေသည်။

နိုင်ငံတကာ အစိုးရများအနေဖြင့် မြန်မာနိုင်ငံသို့ လေယာဉ်ဆီ တင်ပို့၊ ရောင်းချ၊ လွှဲပြောင်း ပေးနေသော တရုတ် အလံတင် သင်္ဘော HUITONG78၊ ဗီယက်နမ် ကုမ္ပဏီ Hai Linh ၊ တရုတ် နိုင်ငံပိုင် လုပ်ငန်း CNOOC ကော်ပိုရေးရှင်း (စင်ကာပူ)၊ စင်ကာပူ အခြေစိုက် Sahara Energy International ကုမ္ပဏီ၊ နိုင်ငံတကာ ကုမ္ပဏီများနှင့် လေယာဉ်ဆီ သယ်ယူနိုင်ရန် အာမခံ ဝန်ဆောင်မှု ပေးနေသော ယူကေ (UK) ရေကြောင်း အာမခံ ကုမ္ပဏီများကိုလည်း ချက်ချင်း ပိတ်ဆို့ အရေးယူရန် လိုအပ်နေပါသည်။ ဥရောပ ကုမ္ပဏီ Airbus အနေဖြင့်လည်း တရုတ်အစိုးရပိုင် AVIC ကုမ္ပဏီနှင့်အတူ စစ်ရာဇဝတ်မှုများတွင် ပါဝင် ပတ်သက်နေမှုများကို အမြန်ဆုံး အဆုံးသတ် ရပ်တန့်ပြီး လိုအပ်သော အရေးယူ ဆောင်ရွက်မှုများ ပြုလုပ်ရမည်ဖြစ်သည်။

မြန်မာနိုင်ငံသို့ လေယာဉ်ဆီတင်သွင်းမှု ကွင်းဆက်တစ်ခုလုံးတွင်ပါဝင်သော နိုင်ငံတကာကုမ္ပဏီများ၊ အစိုးရများသည် တာဝန်ယူမှုရှိစွာဖြင့် ထိုလေယာဉ်ဆီများကို မည်သူများမှ မည်ကဲ့သို့ အသုံးပြုမည်ကို ထိရောက်သော စီစစ်မှုများ ပြုလုပ်ပြီးမှသာ တင်သွင်းရမည်ဖြစ်ပါသည် သို့မဟုတ် လေယာဉ်ဆီ တင်သွင်းမှုများအားလုံးကို ပိတ်ဆို့တားဆီးနိုင်ရန် အရေးယူဒဏ်ခတ်မှုများ ပြုလုပ်ရမည်ဖြစ်ပါသည်။ မြန်မာနိုင်ငံသို့ တင်သွင်းမည့် လေယာဉ်ဆီများကို စောင့်ကြည့်နိုင်သည့် ယန္တရားတခု ထူထောင်၍ ထိရောက်သော စီစစ်မှုများပြုလုပ်ရန် သွေးစွန်းငွေ ဖြတ်တောက်ရေး လှုပ်ရှားမှု အဖွဲ့မှ တောင်းဆိုလိုက်သည်။

Blood Money Campaign (သွေးစွန်းငွေ ဖြတ်တောက်ရေး လှုပ်ရှားမှု) ၏ ပြောရေးဆိုခွင့်ရှိသူ မူလန် က

“ မြန်မာ စစ်အုပ်စုကို လေယာဉ်ဆီ ပိတ်ဆို့မှုတွေ လုပ်ပါတယ်ဆိုတာ ပြည်တွင်း ကုမ္ပဏီတွေကိုသာ ဖြစ်ပါတယ်။ လေယာဉ်ဆီက နိုင်ငံတကာ ကုမ္ပဏီတွေကနေ လာတာပါ။

မူရင်း အဓိကကျတဲ့ နိုင်ငံတကာ လောင်စာ ကုမ္ပဏီတွေ၊ ရေကြောင်း အာမခံ ကုမ္ပဏီတွေကို ဘယ်နိုင်ငံကမှ အခုအချိန်ထိ အရေးမယူသေးပါဘူး။ နိုင်ငံတကာကနေ ပို့နေတဲ့ လေယာဉ်ဆီတွေကြောင့် မြန်မာပြည်က အရပ်သားပြည်သူတွေ၊ ကလေးငယ်တွေ၊ အမျိုးသမီးတွေ နေ့စဉ်သေကြေ ပျက်စီးနေရပါတယ်။ အရပ်သားတွေရဲ့ နေ့စဉ် လူမှုဘဝတွေ အသက်မွေးဝမ်းကြောင်းတွေ ဆုံးရှုံးနေရပါတယ်။

နိုင်ငံတကာ အစိုးရတွေအနေနဲ့ ရာဇဝတ်ဂိုဏ်း စစ်အုပ်စုကို လေကြောင်းတိုက်ခိုက်မှုတွေ ရပ်ဖို့ စာထုတ် ပြောနေမယ့်အစား စစ်အုပ်စုကို လေယာဉ်ဆီ၊ လေယာဉ် ဆက်စပ်ပစ္စည်းတွေနဲ့ နည်းပညာတွေ ရောင်းချ ထောက်ပံ့ပေးနေတာ အားလုံးကို ရပ်တန့်လိုက်မှပဲ လေကြောင်းတိုက်ခိုက်မှုတွေ အမှန်တကယ် ရပ်သွားမှာမို့ ချက်ချင်း အရေးယူ လုပ်ဆောင်ဖို့ အရေးတကြီး လိုအပ်နေပါတယ် “ ဟု ပြောသည်။

အစီရင်ခံစာအပြည့်အစုံကို ယခု link – https://drive.google.com/…/1XXkMVnb2CeHBuZhwH7s…/view… တွင် ဖတ်ရှုနိုင်ပါသည်။

[သတင်းထုတ်ပြန်ချက်] ရာဇဝတ်ဂိုဏ်း စစ်အုပ်စု၏ လေကြောင်းတိုက်ခိုက်မှုများကို နိုင်ငံတကာမှ ဆက်လက်ပံ့ပိုးနေသဖြင့် အမျိုးသမီး၊ ကလေးငယ် နှင့် သက်ကြီးရွယ်အိုများအပါအဝင် အရပ်သားပြည်သူများ၏ အသက်၊ အိုး၊ အိမ် များ ပျက်စီးနေပြီး နေ့စဉ် ရှင်သန် ရပ်တည်ရန် အခြေခံ လိုအပ်ချက်များ အပေါ် ဆိုးရွားသော အကျိုးဆက်များ ဖြစ်ပေါ်နေ