နိုင်ငံတကာ ပိတ်ဆို့အရေးယူမှု လိုအပ်နေသော လေယာဉ်ဆီ
ပြည်တွင်း၊ ပြည်ပ အရပ်ဘက် အဖွဲ့အစည်းများ၊ တော်လှန်ရေး အင်အားစုများ၊ လူ့အခွင့်အရေး ကာကွယ်သူများ၊ သုတေသန အဖွဲ့အစည်းများ နှင့် Blood Money Campaign အပါအဝင် ကမ်ပိန်း အဖွဲ့များမှ အသိပညာပေး စည်းရုံးလှုံ့ဆော်မှုများ ပြုလုပ်ပြီးနောက်၊ လေယာဉ် အစိတ်အပိုင်းများ အပါအဝင် မြန်မာနိုင်ငံသို့ လေယာဉ်ဆီ ထောက်ပံ့မှု ရပ်တန့်ရန် နိုင်ငံတကာ အသိုက်အဝန်းက ပိတ်ဆို့ အရေးယူထားသည်။
သို့သော် ထိုအရေးယူ ဒဏ်ခတ်မှုများသည် မြန်မာပြည်တွင်း ကုမ္ပဏီများကိုသာ ပိတ်ဆို့ခြင်းဖြစ်ပါသည်။ ပိတ်ဆို့အရေးယူမှုများ၏ စောင့်ကြည့်ရေး ယန္တရား နှင့် အရေးယူ ထိရောက်မှုများ အားနည်းသောကြောင့် စစ်အုပ်စု အနေဖြင့်လည်း လေယာဉ် အစိတ်အပိုင်းများနှင့် နိုင်ငံတကာမှ လေယာဉ်ဆီ ကို ဆက်လက်ရရှိနေဆဲ ဖြစ်သည်။
စစ်အုပ်စုအနေဖြင့် သယံဇာတ အရင်းမြစ်များကို ခေါင်းပုံဖြတ်အသုံးချနေပြီး စီးပွားဖြစ် အရပ်သုံးလေယာဉ်ဆီများကိုလည်း စစ်ဘက်အတွက် ရယူသုံးစွဲနေနိုင်သည်။ ဥပမာအားဖြင့် မြန်မာစစ်အုပ်စုသည် အများပြည်သူလေယာဉ် အများစုတွင် အသုံးပြုနေသည့် Jet A-1 လေယာဉ်ဆီကို လေကြောင်းတိုက်ခိုက်မှုများတွင် လည်း အသုံးပြုလျက်ရှိသည်။ စစ်ရေးအတွက် အခြားအမျိုးအစားလေယာဉ်ဆီများကို လည်း အသုံးပြုနေသည်။
စီးပွားရေးအရင်းအမြစ်များကို ခေါင်းပုံဖြတ်အသုံးချနေမှုအပြင် နိုင်ငံတကာအစိုးရ အချို့မှ ချမှတ်ထားသော အရေးယူပိတ်ဆို့မှုများ ရှိသော်လည်း စစ်အုပ်စုက ရန်ကုန်မြို့ရှိ သီလဝါဆိပ်ကမ်းမှ လေယာဉ်ဆီများကို ၂၀၂၃ နှင့် ၂၀၂၄ ခုနှစ်များတွင် ဆက်လက်ရရှိနေကြောင်း Amnesty International ဖော်ထုတ်ခဲ့သည်။
ဤသေစေနိုင်သော လေယာဉ်ဆီကို တင်ပို့ရောင်းချသူများက ဗီယက်နမ်၊ စင်ကာပူနှင့် မလေးရှားရှိ သိမ်းဆည်းရေးစက်ရုံများနှင့် ဆိပ်ကမ်းများအစရှိသည့် ကြားခံ ဆိပ်ကမ်း ၊ ကုမ္ပဏီများကို အသုံးပြုပြီး ပိတ်ဆို့မှုများကို ရှောင်လွှဲနေကြသည်။
အာဆီယံ နိုင်ငံများသည် စစ်ရာဇဝတ်မှုများ ပြုလုပ်နိုင်ရန် လိုအပ်သော လောင်စာဆီ တင်သွင်း ဖြန့်ဖြူးရေး ကွင်းဆက်တွင် ကြံရာပါအဖြစ် ပါဝင်ပတ်သက်နေပြီး မြန်မာစစ်အုပ်စုက စစ်ဘက်၊ အရပ်ဘက် မခွဲခြားဘဲ အရပ်သား ပြည်သူများကို ဦးတည်သော လေကြောင်းဗုံးကြဲတိုက်ခိုက်မှုများ ဆက်လက်လုပ်ဆောင်နေသည်။
စစ်အုပ်စုထိန်းချုပ်ထားသော နိုင်ငံပိုင် လုပ်ငန်း မြန်မာ့ရေနံ ဓာတုဗေဒ လုပ်ငန်း (MPE) သည် ပြည်တွင်းခရိုနီ လုပ်ငန်းစုများဖြစ်သည့် Asia Sun Group နှင့် ၎င်း၏ လုပ်ငန်းခွဲများနှင့် ပူးပေါင်းပြီး လေယာဉ်ဆီ ရရှိမှု၊ ဖြန့်ဝေပေးမှုနှင့် သိုလှောင်မှုလုပ်ငန်းများကို ဆက်လက် ဝင်ရောက်ဆောင်ရွက်နေသည်။]
ထို့နောက် ဗြိတိန် အာမခံကုမ္ပဏီ ငါးခုအပါအဝင် သင်္ဘောအာမခံကုမ္ပဏီများသည် မြန်မာနိုင်ငံသို့ လေယာဉ်ဆီ ပို့ဆောင်မှုအတွက် အာမခံ ဝန်ဆောင်မှုများ ပေးခြင်းဖြင့် မြန်မာစစ်အုပ်စုကို လေယာဉ်ဆီ ဆက်လက်ရရှိအောင် ပံ့ပိုးပေးလျက်ရှိသည်။
အပြည့်အစုံသိရှိလိုပါက ယခုသုတေသနစာတမ်းတွင် ဖတ်ရှုနိုင်ပါသည်။
